Laharana 2794 amin’ny Katesizy

Io fiteny ara-baiboly io dia tsy midika toerana (“elanelan-toerana”), fa toe-pisiana ; tsy ny fahalaviran’Andriamanitra fa ny fahamboniana amam-piandrianany. “Tsy ivelan’ny toerana” ny Raintsika, fa “ambonin’izay rehetra” azontsika saintsainina ny amin’ny Fahamasinany. Satria Masina tsy manam-petra Izy, dia tena akaikin’ny fo manetry tena sy manenina tokoa :

Amin’izany antony izany ity teny hoe “Rainay any an-danitra” ity no mifanaraka amin’ny fon’ny olo-marina, izay ao Andriamanitra no monina toy ny ao an-tempoliny. Amin’izany koa no hanirin’ilay izay mivavaka hahita an’Ilay izay antsoiny hitoetra ao aminy[44].

Ireo “lanitra” dia azo heverina koa ho ireo izay mampahita ao aminy ny sarin’ny tontolon’ny lanitra, ary ao aminy Andriamanitra no monina sy mitsangantsangana[45].