Numerus 971 Catechismi

« Beatam me dicent omnes generationes » (Lc 1,48). « Ecclesiae pietas erga beatam Mariam Virginem pertinet ad naturam ipsam christiani cultus ».⁵⁴⁰ Beata Virgo « speciali cultu ab Ecclesia merito honoratur. Et sane ab antiquissimis temporibus beata Virgo sub titulo "Deiparae" colitur, sub cuius praesidium fideles in cunctis periculis et necessitatibus suis deprecantes confugiunt. [...] Qui cultus [...] singularis omnino quamquam est, essentialiter differt a cultu adorationis, qui Verbo incarnato aeque ac Patri et Spiritui Sancto exhibetur, eidemque potissimum favet »;⁵⁴¹ ipse in festivitatibus liturgicis Matri Dei dicatis exprimitur⁵⁴² et in oratione mariana, sicut est sanctum Rosarium, « totius Evangelii breviarium ».⁵⁴³