Numerus 528 Catechismi

Epiphania est Iesu, ut Messiae Israel, Filii Dei et Salvatoris mundi, manifestatio. Cum baptismate Iesu in Iordane et nuptiis Cana, ²³³ adorationem Iesu celebrat a « magis » qui ab oriente venerant. ²³⁴ Evangelium in his « magis » religiones paganas circumstantes repraesentantibus perspicit primitias nationum quae Bonum Nuntium accipiunt salutis per Incarnationem. Magorum adventus in Ierusalem ad regem Iudaeorum adorandum ²³⁵ ostendit, eos in Israel, sub luce messianica stellae David, ²³⁶ Illum quaerere, qui rex erit nationum. ²³⁷ Eorum adventus significat paganos Iesum invenire et Illum ut Filium Dei et Salvatorem mundi adorare non posse nisi se ad Iudaeos vertant ²³⁸ et ab illis Promissionem accipiant messianicam sicut in Vetere continetur Testamento. ²³⁹ Epiphania manifestat gentium plenitudinem intrare in Patriarcharum familiam ²⁴⁰ et « Israeliticam dignitatem » ²⁴¹ acquirere.