Numerus 489 Catechismi

Toto Veteris Foederis decursu, missio Mariae ab illa sanctarum mulierum est praeparata. Prorsus initio, est Eva: ipsa, non obstante sua inoboedientia, Promissionem recipit descendentiae quae Maligni erit victrix ¹³³ et Promissionem de eo quod ipsa cunctorum viventium mater futura est. ¹³⁴ Vi huius Promissionis, Sara, non obstante sua magna aetate, filium concipit. ¹³⁵ Deus, contra omnem humanam spem, id eligit quod tamquam impotens considerabatur et debile ¹³⁶ ut Suam fidelitatem erga Suam ostendat Promissionem: Annam, matrem Samuelis, ¹³⁷ Deboram, Ruth, Iudith, Esther multasque alias mulieres. Maria « praecellit inter humiles ac pauperes Domini, qui salutem cum fiducia ab Eo sperant et accipiunt. Cum ipsa tandem praecelsa Filia Sion, post diuturnam exspectationem Promissionis, complentur tempora et nova instauratur Oeconomia ». ¹³⁸